Het jy al gewonder wie die meesterbrein agter Snuffels.co.za is? Wel, maak jouself gereed vir ’n vinnige koffieklets met Reynardt, Groot-Brakrivier se eie ‘brakkie’ en gemeenskapsliefhebber, wat al agt jaar diep wortel geskiet het in ons pragtige kusdorpie.
Met ’n passie vir koppies koffie (die sterker, die beter) en ’n hart vol stories, het Reynardt vier maande gelede Snuffel begin om al die dorpsnuus onder een dak in te bring. Hoekom? Want glo dit of nie, nie almal in Groot-Brak spandeer hul dae op sosiale media nie! Ja, dis waar: daar is ’n klomp mense in ons gemeenskap wat liewer hul nuus per e-pos ontvang (en ons res van die nuuskieriges wat net nie ’n lekker storie kan weerstaan nie).
Maar wat is Snuffel presies? Dis ’n gemeenskapsnuusbrief wat mense, besighede en stories bymekaar bring – ons eie digitale kuierplek, sonder dat jy jou pantoffels hoef uit te trek! Hier deel ons alles van nuusbrokkies oor plaaslike besighede, tot stories van onontdekte skatte en gebeure wat jy andersins dalk misgeloop het.
Reynardt sê, “Snuffel is hier om ons dorp nader aan mekaar te bring en om vir almal ’n plekkie te gee waar hulle kan klets en lees oor wat reg rondom ons gebeur.”
Dus, as jy nog nie ingeteken het nie, maak gou! Drink ‘n lekker koffie, teken in, en deel Snuffel gerus met jou bure, tannies en sommer die hele straat. En onthou, ons soek altyd vars stories! Stuur enige dorpsnuus, slim stories en geselsies ons kant toe sodat ons die gemeenskap kan bly vermaak en inlig – sonder die lawaai van sosiale media.
Cheers op nóg ’n koppie saam met Reynardt, en hier’s op die volgende storie!
Add Comment
You must be logged in to post a comment.